Kum 85+ leh rualbanlo voter zat 8,138

Lok Sabha inthlanpui kal mekah Mizoramah kum 85 chung lamte leh rualbanlo (persons with disabilities) vote nei mi 8,138 an awm a, an awmna hmun ṭheuhah postal ballot hmangin vote thlaktir mek an ni.

Sorkar thuchhuah tarlan danin, Aizawl district-ah kum 85 chin chung lam leh rualbanlo (PwD) voter mi 2,271 awmin, an tamna ber district a ni a; voter awm zawng zawng mi 8,138 aṭangin 27.90% a ni. Hnahthial district-ah mi 130 (1.59%) awmin an tlem ber thung.

Mizoram pumah PwD voter 3,397 an awm a, kum 85 chung lam vote nei mi 4,741 an awm. Rualbanlo, mahni ina vote thlak thei chin chu rualban lohna 40% chin chung lam leh disability certificate neite an ni.

Lok Sabha inthlana venhimna lama hna thawktu service voter 4,963-te hnenah e-postal ballot (electronically transmitted postal ballot) thawn chhuah a ni a; postal ballot chu service voter-te awmna hmunah print a ni ang a, vote an thlak hnuah Returning Officer hnenah an thawn ang. Service voter hi mipa 4,872 leh hmeichhia 91 an awm a ni.