YMA CCC an ṭhukhawm

YMA rorelna sang ber dawttu, Central Coordination Committee (CCC) chu nimin khan Bawngkawn South YMA Hall-ah an ṭhukhawm a, Central YMA hruaitute bakah, sub-headquarters, group YMA leh Aizawla branch aiawh mi 220 an tel.

YMA CCC meeting vawi 99-na hi CYMA president Lalhmachhuana'n a kaihruai a, general secretary Prof. Malsawmliana'n CYMA hmalakna hrang hrang a sawi. YMA Inkhawmpui Lian 2023-a rorelte bawhzui dan thlirho a ni.

CYMA president Lalhmachhuana chuan, rorel palaite chu ruihhlo donaah theihtawp chhuaha ṭan la turin a chah a; Mizorama hnam dang phalna nei loa sumdawngte leh hnam dang lirtheia sumdawng tam lutukte enfiah kawnga hma la zel tur te, tuihna humhalh kawnga theihtawp chhuah zel turtein a chah bawk.