Chief Minister-in sorkar hnathawkte a chhe thei ang berin a puh - MNYF

Mizo National Youth Front (MNYF) chuan nimin khan Aizawl Press Club-ah thuthar thehdarhtute an kâwm a; chief minister Lalduhoma'n sorkar hna­thawkte a chhe thei ang berin a puh nia sawiin, ngaih­­dam dil turin an phût.

MNYF president Zodin­puia chuan, CM Lalduh­oma'n Shillong-ah Mizoram sorkar hna­thawkte a chhe thei ang berin a puh nia sawiin, "Pawl ang te, asso­ciation ang te, a depart­ment pum angtea vawiinah hian min do lêt an tum mek a ni. A bik takin Police department-ah chu chu a awm mek a ni, tiin a sawi. A mak kan ti hle," a ti.

Zodinpuia chuan, Lalduhoma'n thu dik lo hmangin sorkar hna­­thawkte a puh ni ngeia an hriat thu sawiin, "A thusawi hi sorkar hnathawkte hmai tibâltu a nih avangin April 18, 2024 hma ngeia sorkar hnathawkte chunga ngaihdam dil turin CM kan phût," a ti a, hun rei lo tê a CM chhungin Lalduhoma'n sorkar hnathawkte diriam zawngin thu a sawi hnem tawh niin a sawi.

MNYF President chuan, Assembly budget session zawh tâkah Mizoram police-te chu nasa takin Lalduhoma'n a diriam nia sawiin, "Mizoram mipui hmaah, Mizoram Police-te chu thlamuanpui tlak an nih loh thu uar takin a sawi. Hnathawkte rilru tihnual thei zawnga thu a sawi fo hian sorkar inrêlbawlnaah nghawng ṭha lo a neih kan hlauhpui hle," a ti.

Lalduhoma kaihhruai sorkar chu Mizoram sorkar zingah ni 100 chhunga mi dang sawisel nasa ber leh ram mipui thu dik lo hrilh nasa ber an la nih hial a rinawm thu sawiin Zodinpuia chuan, "Thla thum báwr chauh sorkarna an kalpui chhung hian Mizo ṭhalai leh zirlaite beidawnna nasa takin an thlen," a ti a; inthlan hmaa an intiamnate an sawi zuzi ṭan mek niin a sawi.

MNYF hruaitute chuan, ZPM party-in sorkarna an chan chuan development bank an din dawn thu leh chumi kaltlang chuan ṭhalaite hnenah loan pung awm lo chi an pek dawn thu an sawi tih an tarlang a, "Sorkar chu a thlawna guarantor-ah a ṭan dawn thu nasa takin an tlangaupui. Sorkarna fawng an vawn hnuah erawh ‘Mizoram Ceiling on Government Guarantees Act’ kan neih avangin loan pung awm loa pek leh a thlawna sorkar guarantor-a ṭan chu tihhlawhtlin mai theih a ni lo, tiin min bum leh mek," an ti.

Lok Sabha MP inthlan tur chungchangah MNYF hruaitute chuan, MNF candidate K Vanlalvena chu Mizote tana sûlhnu ropui tak hnutchhiahtu niin an sawi a, "Kan ram leh hnam, kan sakhua humhim turin a rintlak ber," an ti. K Vanlalvena vote turin Mizoram mipui an ngen a ni.(Phek 2-ah zawm a ni)