Central hotute'n central minister ni turin green signal min pe tawh - Vanlalhmuaka

Lok Sabha MP atana BJP candidate Vanlalhmuaka chuan nimin khan Kolasib Press Club-ah thuthar thehdarhtute a kâwm a; MP-ah a tling a nih chuan central lama an hotute'n central minister ni turin 'green signal' an pe tawh niin a sawi.

Vanlalhmuaka chuan, hmarchhak state pariata BJP state president zingah candidate awm chhun a nih thu sawiin, "Kristian MP candidate zinga Lok Sabha-a ding awm chhun ka ni. MP-ah ka tling a nih chuan central hotute'n central-a minister ni thei turin green signal min pe tawh," a ti.

Mizoramin sorkar laipuia minister Dr C Silvera a nei tawh tih sawiin Vanlalhmuaka chuan, "Dr C Silvera central minister a nih avangin Mizoramin hmasawnna kan nei nasa hle. Mizorama MP candidate-ah chuan central-a minister ni thei awm chhun ka ni," a ti a; amah vote turin Kolasib district mipui a ngen.

Vanlalhmuaka chuan, inthlan dawn apiangin Congress party-in BJP chu Kristian rama Hindu sakhua din tumah an puh ṭhin nia sawiin, "Mizoram BJP hi pawisa duh vangin vai pathian hmaah chal hnawih sen leh coconut sawh keh hi kan ti ve ngai dawn lo. Congress chief minister Pu Lal Thanhawla chuan sum duh vangin vai pathian bán sawm nei hmaah chal hnawih senin, coconut a sawh keh," a ti.

Mizoram BJP President chuan, MP a nih chuan PM scheme hrang hrang - in sak ṭanpuina te, loneitute tana ṭanpui te, loneitu kum 60 a tlin huna pension an lak theihna tur te, gas connection nei lote hnena free gas connection tihte chu hma an lak nghalna tur a nih thu a sawi bawk.