MNF President-in mimal a chhe lama sawisel vak lo turin an mite a chah

MNF hruaitute chuan nimin khan Mizo Hnam Runah Lok Sabha inthlan tur an thlirho a; president Zoramthanga chuan, a chhe zawnga mimal sawisel vak vak a hrisel loh avangin ti lo turin an mite a chah.

MNF President chuan, "Mimal a chhe zawnga insawisak vak vak hi thil hrisel lo leh hnam ang pawha kan hmél tibâltu a nih theih avangin keini chuan ching ve lo ila. Hetiang uar ṭhin pawlte ze chhe tak hi i chíng ve hauh lo ang u," a ti.

Zoramthanga chuan, MP atana an candidate K Vanlalvena chu an vanneihpui ngei a beiseiawm niin a sawi a; "Pathian leh mipui zarah tun MP inthlanah hnehna kan chan ngei a beiseiawm," tiin, ram, hnam leh sakhaw him nan an candidate tan theihtawp chhuah turin an mite a sáwm.

MNF President chuan, ZPM candidate chu belebut taka an vawrh chhuah a nia sawiin, "Hei hian mipui mar deh kawngah ngaihtuahna thui tak séng leh séng lo hmel a tilang a ni," a ti.

Inhmuhkhawm hi MNF MP (RS) Election Campaign Directorate chairman Tawnluia'n a kaihruai a; elected office bearer te, national core committee leh political affairs committee member te, adviser, general secretary leh secretary-te an tel a ni.