Kristiante kan inhumhimna awm chhun chu INC vote tlin a ni - MPCC President

Congress party chuan nimin khan Khawlailung leh Serchhipah vantlang inkhawm an buatsaih a; MPCC president Lal Thanzara chuan, Mizo Kristiante inhumhimna awm chhun chu INC vote tlin a nih thu a sawi.

MPCC President chuan, an khing­puite chu pa ṭha tak an nih rualin, BJP talhfiak, RSS, Bajrang Dal leh VHP-te nena thawkho an niin a sawi a, "Thlan tlin ka nih chuan BJP lamah ka ṭhu dawn titu MNF candidate leh BJP rizai kan sin ve dawn lo tih sawi chiang ngam miah lo, a ṭul dan azirin tih bâk sawi thei lo ZPM candidate-te hi an tling a nih chuan Parliament-ah an bán pharna tur lam a chiang sa. Mizo Kristiante kan inhumhimna awm chhun chu INC kan vote tlin hi a ni," a ti.

RSS, Bajrang Dal leh VHP-te tum ber chu Kristian sakhua leh Congress party nuai chimih a nia sawiin Lal Thanzara chuan, "Kristianna leh missionary-te thlavâng hauh a, BJP nêk tak tak ngam tur chu Congress party chauh kan ni," a ti a; mahni party dahṭha a, sakhaw humhimna atan INC candidate Lalbiakzama vote turin Mizoram mipui a sawm.

INC candidate Lalbiakzama pawhin thu sawiin, BJP sorkar hnuaiah India ram a chhe chak hle niin a sawi a, "Press Freedom Index, khawvel ram hrang hrang 180 chuang zinga chanchinbumite zalenna tehnaah India ram chu 161-na kan ni mek. Chanchinbumite zahawmna leh an zalenna hi a tlahniam chak hle," a ti a; India ram democracy a tlahniam chak hle a ni tih a lantir thu a sawi.