Zu siamna hmun pasarih tichhia

Mamit district-a Excise & Narcotics department (END) mite chuan April 9, Thawhlehni khan Bâwngva khua leh a chhehvelah zu siamna hmun an dap a, zu siamna hmun pasarih an tichhia.

END mite hian Bâwngva khua leh a chhehvelah hian zu thlawrna bel eng emaw zat, zu bilh lai ṭín 150 leh rakzu litre 15 an man a, zu thlawrna hmun pasarih an tichhia a ni.

April 5, 2024 pawh khan North Sabual khua leh a chhehvela zu siamna hmun 12 an tihchhiat tawh bakah, zu siamna hmanrua leh zu tam tham tak an man tawh. Sorkar thuchhuah chuan, North Sabual leh Bawngva khuate chu Mamit aṭanga hnai tê, zu siamna hmun awmna a nih thu a tarlang.

Mamita END assistant commissioner Lalsangzuala Ralte chuan, MP inthlan tluang taka neih a nih theih nan zu leh ruihhlo dang lakah fimkhur a, inhnamhnawih lo tur leh inthlanna felfai tak a awm theih nan ruihhlo vanga boruak ṭha lo siam lo turin district mipui a chah a, "Mamit district Excise department chuan theihtawp chhuahin zu leh ruihhlo dang kan zawng zel dawn," a ti.