Ka thlaphâng lo reng reng - K Vena

Lok Sabha inthlan atana MNF candidate K Vanlalvena leh amah ṭawiawmtute chuan nimin khan Lawngtlai Areopagi-ah vantlang inkhawm an buatsaih a; K Vanlalvena chuan, Pathian a hmachhuan a, a thlaphân loh thu a sawi.

K Vanlalvena chuan, MP inthlanah ruling hian opposition an beih vak a hre ngai lo a, ani erawh chuan beih a tâwk nasa niin a sawi a, "Pathian ka hmachhuan a, kei leh kan party hi tla hlim ni mah ila, Lalpa'n min pui ang a, ka thlaphâng lo rêng rêng," a ti.

MNF Candidate chuan, "Politics kan khelh chhan hi sum leh pai, therhlo lam a ni lo. Kan hnam damna tur atan a ni zawk. Kan hnam damna tura politics khel ngam lo chuan khel lo mai rawh se, tih hi ka ngaihdan a ni," a ti a; ram hruaitute'n an theih anga nasain ram an hmangaih tura a ngaih thu a sawi.

MNF senior vice president Dr R Lalthangliana pawhin thu sawiin, "Kristian sakhua nêkchêp­na do tura nasa taka Parlia­ment-a au chhuak ngam Kristian MP awmchhun, India sorkar official-te leh a member-puite hmelhriat nei ṭha sa, inzir chawp ngai lo Pu Vena thlang ila, Mizoram chhung leh khawvel hmun hrang hranga Zo fate tan a thlamuanthlak hle dawn a ni," a ti.