Phainuama sikulah bomb a puak

November 7, Inrinni zing dar 2 vel khan Assam leh Mizoram inrìna bula Phainuam khuaah mimal rama Bengali Medium School building-ah bomb a puak a, sikul a tichhe nual. Hemi chungchangah hian Home department chuan, Mizoram sorkarin pawi a tih thu leh Vairengte Police Station-ah thubuai ziah luh a nih thu a tarlang.

Home department thuchhuah tarlan danin, Inrinni zing dar 2 hma deuhin Phainuama Bengali medium school-ah bomb tihpuah a ni a; Mizoram sorkarin bawhzui nghalin, Inrinni chhun khan a hmunah Mizoram police-te leh Forensic team-te a tír nghal a ni.

Bomb puahna hmun tlawhtute zingah hian DIG (Northern Range) Lalbiakthanga Khiangte pawh a tel a;  a rang thei ang bera chhui chhuah a nih theihna turin sorkarin hma a la dawn tih sorkar thuchhuah chuan a tarlang.