Home voting atan training nei

Champhai district election officer James Lalrinchhana hoin nimin khan in lama vote thlâk (home voting) training thawh hnihna neih a ni. Champhai district-ah hian naktukah home voting ṭan a ni ang.

James Lalrinchhana chuan, home voting chu democracy chawi nun zelna tura hmanraw pawimawh leh ECI hmalakna chhuanawm tak a nih thu a sawi a, "Home voting hi mi náwlpui vote thlak hmaa vote thlak bul ṭanna, inthlan tênau a ni. ECI-in a ngaih pawimawh em avangin kalpah mai mai a rem lo a, inthlan hmasa aia felfai leh changtlung zawka kalpui tum a ni," a ti.

Champhai district-ah hian April 12-13, 2024 chhungin home voting kalpui tum a ni a; home voting dilna lut pawmsak mi 134 zinga 133 chu kum 85 chung lam niin, rualbanlo pakhat a awm. Home voting kalpui turin polling team 16 ruat a ni.