Ugadi, Gudi Padwa leh Bihu lawm a ni

Governor Dr Hari Babu Kambhampati hoin April 9, Thawhlehni zan khan Raj Bhavan-ah Ugadi, Gudi Padwa leh Bihu kût lawm a ni.

Kût hmannaah hian hnam lâm chi hrang hrang - Kuchipudi làm, Telugu fusion, Bihu làm, Bodo làm, Assamese làm, Marathi fusion làm, Bharatnatyam làm, Bhangra làm leh Punjabi làmte leh Mizo hnam làmte Mizoram University, Pachhunga University College, Hrangbana College leh RIPANS zirlaite'n an entir a ni.

Larsap chuan, Ugadi chu kût pawimawh, intuaithar lehna kût a nih thu a sawi a, "He kut hi intuaithar lehna entirna a nihna angin state hrang hrang - Andhra Pradesh, Telangana, Karnataka leh Maharashtra-ahte chuan mahni in chei nan te, kawr thar lei nante leh inhlan thar nantea hun hman thin a ni," a ti.

Governor chuan, he ní vek hian Maharashtra-ah Marathi ho kum thar lawm nan Gudi Padwa hman ṭhin a nih thu a sawi a; Assam-ah an kum thar bul ṭanna entirna kût Bohag Bihu chu April 14 lawm a nih dawn thu a sawi bawk.

India rama hnam hrang hrangin kût an hmante chu India ram ropuina belhchhahtu a nih thu sawiin Larsap chuan, "State hran, hnam hran, sakhaw hran leh ṭawng hran ṭheuh nei ni mah ila kan zavaiin India khua leh tui, ram inpumkhat kan ni," a ti.