KHAWTHLIR

Hnahthialah Home voting

Hnahthial district-ah nimin khan kum 85 chin chung lamte an inah vote thlaktir ṭan a ni. Home voting buaipui turte chu SDC Betty Lalrinfeli'n DC pisa tualzawl aṭangin a vailiam. Hnahthial district-ah hian home voting dil mi pasarih an awm a, kum 85 chung lam vek an ni.

Heroin man

Excise & Narcotics department chuan April 9, Thawhlehni tlai dar 3:30 khan Khuangléng dáia Leisekawtah heroin gram 810.100 (hawng 61) leh a neitua puh Hrangherkapa (62) s/o Tawkliana (L), Khawthlir, Myanmar nia inchhál an man. NDPS Act, 1985 tlawhchhanin thubuai ziah luh a ni a, Hrangherkapa chu nimin khan Champhai Judicial Court-ah hruai a ni.

EVM tifel

Nimin khan Lunglei, Siaha, Champhai, Serchhip, Lawngtlai leh Mamit district-ahte Lok Sabha inthlanpuia hman tur electronic voting machine leh a kaihhnawih khawlte tihfel (commission) a ni. EVM tihfelnaah hian inthlan kaihhnawih hotu te, political party aiawhte leh Electronics Corporation of India Limited (ECIL) engineer-te an tel.

Training buatsaih

Nimin khan BCM Hall, Serkawnah Lok Sabha inthlanpui awm tura Lunglei district-a hmeichhe hlangin an vil tur polling station 24-a duty tur mi 111-te tan training buatsaih a ni. Lunglei district-ah hian polling station 176 a awm a, chu'ng zinga 24 chu hmeichhe hlangin an enkawl dawn a ni.

Sum che vel endik

Mizoram Lok Sabha inthlana expenditure observer Arvind Sharma leh Anita Rinesh te hoin nimin khan Aizawl DC conference hall-ah candidate aiawhte sum che vel leh an sum hman dan chhinchhiahna leh accounting team atana DEO-in a ruatte register enfiah a ni. Expenditure agent-te chu rinawm leh fimkhur taka sum vawng tur leh a theih chin chinah sumfai hmang loin, cheque emaw, online transaction emaw hmang uar tura chah an ni.