Minister-in lei tawlhna hmun tlawh

Inrinni zing khan Aizawl West-II bialtu MLA Lalruatkima, minister of state chuan Vaivakawn - Hunthar - Chanmari West lei tawlh avanga khawtlangin harsatna an tawh enfiahin, Aizawl DC R Lalramnghaka, SIPMIU, PWD hotute leh khawtlang hruaitute nen hmalak dan tur an sawiho.

Lalruatkima chuan building engemaw zat ṭhiah tawh a nih thu sawiin, "Chhungkua 30 chuang zet chenna in chhuahsan an awm a, tun dinhmuna harsatna lian tak pakhat chu SIPMIU pipe feet 2 leh inches 4 a lian, feet 6-a thuk chu kum 2018 khan phum a ni. Vaivakawn-Hunthar-Chanmari West area-a lei tawlh zel hian pipe phum hi elhin, pipe hian lei tawlh zel tur pawh a chhan hle in a lan laiin, lei tawlh zelin pipe a hnawl tak zel avangin hmun dang che lo tur pawh a ti che palh thei," a ti.

Lalruatkima chuan helai hmun hi uluk taka zir chiang turin leh ṭhál chhunga tui luanna mumal zawk leh kawng siamṭhat dan tur District Disaster Management Authority, SIPMIU, PWD leh khawtlang hruaitute nen sawi khawm leh turin rawtna a siam.

Helai kawng hi inkal pawhna pawimawh tak a nih avangin sorkar chuan a ngai pawimawh tak zet tih sawiin Lalruatkima chuan, khawtlang hruaitute chu ngaihtuahna zau tak neia, sorkar ruahmannate thlawp turin a sawm.