MLP Rules hman thuai tum a ni Zu zawrh theihna a awm dawn lo

Vanglaini palai zawhna chhangin END minister Dr K Beichhua chuan, MLP Rules an peih tawh thu a sawi a, "Covid-19 avangin Cabinet meeting neih hleih theih a ni lo a, chuvangin, by circulation-a hman mai rawtna Chief Minister hnenah kan thawn tawh," a ti a; Rules-ah chuan MLP Act-a awm lo thil thar a awm vak loh thu a sawi.

Dr K Beichhua chuan, MLP Rules-ah hian Champhai leh Hnahlan grape winery duhsakna a awm dawn thu sawiin, "Kut hnathawk, grape chíngtute hamṭhatna tur ngaihtuah a ni. Winery-te hian kohhrante nen pawh MoU an ziak tawh. Chutih rualin, wine siam chhuaha alcohol tel zat percentage chu sorkarin khauh takin a bituk ang," a ti.

MLP Rules-ah zu zawrh lam a tel lo tih sawiin Minister chuan, "Tlema han thlahdul deuh kan tumin sawiselna a nasa a, chuvangin, zu zawrh a ni dawn lo," a ti a; mipui duh danin khauh takin zu khap chhunzawm zel a nih tur thu a sawi.

December 19, 2019-a MLP Rules tihchhuah ang chuan, phalna nei tan beer leh wine siam leh zawrh theih a ni a, hun bikah tualchhung zu (country liquor) pawh siama zawrh theih a ni. Sorkarin zu dah khawmna tur kudam a siam ang a, chuta ṭang chuan phalna neite'n zu an lei thei ang. Zu pek chhuah turte chu quality leh brand a zirin a man sorkarin a bituk tura tih a ni.

February 2020-a Assembly session-ah END Minister hian INC member KT Rokhaw zawhna ziaka a chhànnaah, December 19, 2019-a MLP Rules notification hmanga tihchhuah chu sût (cancel) a nih thu Assembly House a hrilh.

January 13, 2020 khan chief minister Zoramthanga pawhin Mizo Hnam Rûnah zu khapna dan duan mekah rawtna hrang hrang a awm tih a sawi a, "Dan hmasa lama awm tawh, zupui leh zufáng ang chite kût nía entira pholante a ṭha em, tihte rawtna a awm. Inrâwn tawnna kalpui mek a nih laiin zu zuar leh tur ang lek leka sawina a awm," tiin a lo sawi tawh a ni.