Ram himna tur ngaihtuah vangin FMR tihtàwp leh ramri hung a ṭul - External Affairs Minister

Sorkar laipuia External Affairs minister Dr S Jaishankar chuan, free movement regime (FMR) tihtawp a nih chhan leh India leh Myanmar ramri hung tum chhan a sawifiah a; India ram himna tur ngaihtuah vang a nih thu a sawi.

Lok Sabha inthlan awm tura Mizoram BJP manifesto Hotel Regency-a nimina a tlangzarh zawha thuthar thehdarhtute kawmin External Affairs Minister chuan, Myanmar leh India mite phalna la loa inkalpawh theihna FMR tihtawp a nih chhan leh ramri hung tum a nih chhan zawhna a chhâng a ni.

Dr S Jaishankar chuan, tunlaiin Myanmar ram a buai a, thuneitu mumal pawh an awm hlei thei lo tih sawiin, "An ram dinhmun a ṭhat loh avang hian dan phal loh thil chi hrang hrang kan ramah an rawn tawlh luh phah nasa hle... Kan himna tur ngaihtuah a ngaih avangin FMR tihtawp leh ramri hung tura thutlukna siam a ni," a ti a, mipuiin an hriatthiam rih a ṭul niin a sawi.

External Affairs Minister chuan, Myanmar ramin ngai a awh leh a, nunphung pangngaia an awm leh a nih chuan FMR tihtawp a ngaih kher loh tur thu leh, ramri hung pawh a ngaih a rinawm loh thu a sawi bawk.

Ṭhenawm ramte nena insumdawn tawnna atan Kaladan Multi Modal Transit Transport Project an ngaih pawimawh thu sawiin Jaishankar chuan, "A rang lama zawh a nih theihna turin inbiakna a kal mek," a ti a; border hub tam zawk buatsaih tum a nih thu a sawi.