Kan candidate dâwta beih a nih vangin criminal complaint kan thehlut dawn - ZPM Legal Department

ZPM Legal department chuan, Lok Sabha inthlana ZPM candidate Richard Vanlalhmangaiha chu dâwt hmanga beih a nih avangin court-ah criminal complaint an thehluh dawn thu an puang.

ZPM Legal Board hotute chuan nimin khan an pisaah thuthar thehdarhtute an kâwm a; an chairman Vanlalsiama Pachuau chuan, April 10, 2024 khan kum 2011 leh 2012 vela MAMCO deputy manager (marketing) Lalrem­thanga leh MAMCO consultant nia chhàl Mustaqur Rahman, Guwahati-te'n contract hna an pek chung­­changa inbum­na thubuai chinfel tawh, hremna pawh tihchhuah tawh kaihhnawihah ZPM MP can­di­date sawi luh ve ṭâlh tum a nih thu a sawi a, "Social media-ah nasa taka theh­darh a ni," a ti.

Vanlalsiama Pachuau chuan, David Sailo inti thu ziah chu Facebook leh Whatsapp-ahte nasa taka thehdarh a nih thu sawiin, "April 10 zan vêk hian Tuesday Nightmare Youtube channel chuan tute emaw be kualin, an inbiakna record chu thehdarh a nih mai bakah, a rin thu belhchhahin, case pawh la kal mek angin a sawi," a ti a; David Sailo leh Tuesday Nightmare thil tih dan chu politics-a dâwt hmanga inbeihna tenawm tak a nih thu a sawi.

ZPM Legal Chairman chuan, Richard Vanlalhmangaiha'n thubuai a nei ve lo a, Lalremthanga leh Mustaqur Rahman te chauh thubuai siamsak an nih thu sawiin, "He thubuai hi chinfel vek tawh niin, Pu Lalremthanga hi November 22, 2022 khan thiam loh chantir a ni a, Mustaqur Rahman pawh February 2, 2023-ah thiam loh chantir a ni. Mustaqur Rahman hi anticipatory bail-a chhuah lailawk a nih laia a tlanbo a vangin thiam loh an chan hun a inang lo," a ti.

Social media-ah leh Youtuber pakhatin thubuaiah Richard Vanlalhmangaiha hmer tel an tum chhana an sawi langsar ber chu affidavit-ah hming a ziak ve tih a nih thu sawiin Vanlalsiama chuan, "MAMCO lam intiamkamna lehkha kan chhiar chuan, MAMCO account-a sum lut ngei tur anga tarlan a ni," a ti a, assistant manager a nihna angin Richard-a pawhin hming a ziak ve ngei tur a nih thu a sawi.

ZPM Legal Department tarlan danin, MAMCO account-a sum lut tur inremna ziah a nih laiin sum luhna erawh MAMCO account-ah ni loin, Lalremthanga leh Mustaqur Rahman account-ah a ni a, chu chu ACB pawhin an chhui chhuak. Affidavit-a hming ziah chungchangah, Richard Vanlalhmangaiha chu an bum tel ve zawk a ni.

Richard Vanlalhmangaiha inhnam-hnawih ve ni se chuan a lakah hian case siamsak loh chhan tur a awm lo tih an sawi a, "Thubuai inṭan laia ruling party chu Congress party a ni a, thubuai ngaihtuah hun lai vel hi MNF party ruling lai niin, thuthlukna siam hun lai pawh hi MNF party rorel hun lai a ni," an ti.

ZPM LEGAL DEPARTMENT SAWI DANGTE

* Thubuaiah Richard Vanlalhmangaiha a tel lo a, thuhretuah a ṭang zawk.

* Thuthar thehdarhtute tàwpsan kan tum lo, criminal complaint file thuai kan tum.

* Thu dik lo ziak a, vawrh darhtu leh mipui rilru hruai kâwi tuma ṭawngkam thiam taka thu dik lo vawrh darh a nih theih nana theihtawp chhuahtu leh thuhretu derte lakah thubuai siam a nih theih ngei nan kan buaipui mek.

* Tuesday Nighmare-i'n a phone hmanga a kawm kha Tlanghmingthanga ni ngeia hriat a ni a, MNF ruhkawl niin, mi ṭhenkhat phei chuan Zoramthanga uite ti hialin an sawi.

* Tlanghmingthanga hi Mission Vengthlang mi hlun ni loin, mi in luaha khawsa ṭhin a ni a, tunah chuan in hmunte leiin, a in sak pawh a nêp vak lo.

* Kendriya Vidyalaya, Lunglei emaw, Champhaia school building sakna tur contract inpek intiamin cheng nuai 25 Vanenga'n a ṭhianpa Tlanghmingthanga nen Lalremthanga hi March 10, 2012 khan an pe.

* May 23, 2012 khan Pu Lalremthanga hian cheng nuai 40 ngaihtuah/pe turin a ti leh a, cheng nuai 40 an neih theih loh avangin cheng nuai 20 chu Lalhmachhuana, despatch rider bank account (Vijay Bank)-ah thun a ni a, Mustaqur Rahman Axis bank account-ah cheng nuai 20 chu RTGS hmanga transfer leh nghal a ni.

* Tlanghmingthanga hian Lalremthanga leh Richard Vanlalhmangaiha te awm dun laia pawisa fai hlan fo ṭhin anga a sawi hi investigation report leh court judgement aṭangin dâwt a sawi chiang hle a ni tih a hmuh theih.