Ramsa chungchang dan zirho; Kum 5 chhungin ramsa tawlh rûk 1,205 man

Mizoram State Legal Services Authority (MSLSA) leh Aaranyak, Society for Biodiversity Conservation, Guwahati chuan nimin khan Gauhati High Court, Aizawl Bench conference hall-ah 'Deterring Wildlife Crimes: Challenges and Opportunities' tih thupui zirhona an buatsaih. Kum 5 chhungin Mizoramah ramsa tawlh rûk 1,205 man a nih thu tarlan a ni.

Zirhonaah hian Supreme Court judge Justice Ujjal Bhuyan chu khuallian a ni a, Supreme Court judge Justice Prasanna B Varale chu khual­zahawm a ni. Justice Ujjal Bhuyan hi Gauhati High Court judge a nih laiin MSLSA-ah executive chairman a lo ni tawh.

Aizawl Customs Division joint commis-sioner Malsawmtluanga chuan, kum 2020 aṭang 2024 chhungin Mizoramah ramsa tawlh rûk (exotic animal) 1,205 man a nih tawh thu a sawi a, "Exotic animal-te hi vulh atan te, damdawi siamna atante hman ṭhin a ni," a ti.

Malsawmtluanga sawi danin, ramsa tawlhrukte chu a tlangpuiin Zokhawthar aṭanga lo lutin, Guwahati a thleng thla a, chuta ṭang chuan India ram hmun hrang hrangah sem darh leh ṭhin a ni.

Justice Ujjal Bhuyan chuan, nungchate'n mihringte tan hna pawimawh tak an thawk tih sawiin, "Nungchate duat taka enkawl a ngai a, inmamawh tawn vek kan nih avangin kan nawm kan mâka tihnat mai mai loh tur a ni," a ti.

Justice Prasanna B Varale chuan, Forest Survey of India tarlan danin, India ram chhung 33% vel chu forest area a nih thu sawiin, "Hengahte hian nungcha chi hrang hrangte an khawsa a, hlim takin an chêng a ni. Nungchate hian kan tan hna an thawk nasa em em a, ṭha taka enkawl tur an nih laiin, mi ṭhenkhatin an suat ṭhin hi a pawi tak zet," a ti a; nungchate tel lo chuan mihringte kum tam tak an khawsa thei lo tih a sawi.

Mizoram IGP Lalbiakthanga Khiangte pawhin thu sawiin, Mizoram chu India rama state zingah ram zau zawng ngaihtuaha ramngaw la nei zau ber a nih thu a sawi a, "Ram 84.53% zet ramngawin a la khuh," a ti a; ramsa tawlhrûk tam tak man a nih tawh thu leh chumi kaihhnawihah chuan mi emaw zat man a nih tawh thu a sawi.

Aaranyak senior law consultant Ajoy Kr Das-in danin nungcha a humhalh dante a sawifiah a; Aaranyak general secretary Bibhab Kumar Talukdar-in khawvela nungchate chunga hleilenna thlen dan a sawi. Gauhati High Court advocate Ajoy Das leh Dampa Tiger Reserve field director Agni Mitra ten thupui an sawi bawk.

Zirhonaah hian Gauhati High Court judge pathum - Justice Michael Zothankhuma, Justice Nelson Sailo leh Justice Marli Vankung te, Mizoram Judicial Service member te, Police mi leh da te, Environment, Forest and Climate Change department leh Customs department officer-te leh Mizoram Bar Association member-te an tel.