India Ambassador-in Zokhawthar a tlawh

Myanmar rama India palai ruat thar (designated ambassador) Abhay Thakur chuan nimin khan Zokhawthar a tlawh a; Champhai Circuit House-ah Champhai district-a sorkar hotu te, tlawmngai pawl leh ramri behchhana sumdawngte a kâwm bawk.

Abhay Thakur chuan, ram pahnih inkarah inlaichìnna ṭha a awm theih nan ṭanrual a pawimawh thu sawiin, "Venhimna lam leh hmasawnna chu thil kal kawp tlat a nih avangin tun dinhmunah thil tih harsa rih mah se, nakin lawkah chuan ramri kaltlanga insumdawn tawnna leh hmasawnna dangte dan pangngaia thawh leh theih ka beisei," a ti.

Culture leh tourism chawisang turin thawh­hona, inkalpawhna kawngpui siam leh hmasawnna ruhrel dangte ngaih pawimawh a nih thu sawiin Thakur chuan, "Ramri kaltlanga dan loa thil tih donaah theihtawp chhuah tlàn a pawimawh," a ti a; state leh central sorkara thlen duh rawtna an neihte chu inthlahrung loa a hnena thlen turin a chah.

Champhai DC James Lalrinchhana chuan, Champhai district chu ramri depa awm a nih thu sawiin, Myanmar ram buai vangin raltlan camp 23 a awm mek thu a sawi.

Inkawmhonaah hian tlawmngai pawlte'n free movement regime (FMR) tihtawp leh ramri hungte an do tlat thu India palai hnenah an thlen. Inkalpawhna kawngpui, raltlan chungchang, ramria insumdawn tawnna, ramri kaltlanga ruihhlo tawlh ven chungchang leh thil pawimawh dangte an thlen bawk.

Abhay Thakur hian nimin vek khan Zokhawthar a tlawh a, Land Custom Station, Immigration Check Post leh Assam Rifles hmunhmate a en a ni.