Party ṭhenkhatin politics-a chirhthehna tur an dap kual nasa - Vanlalhlana

Minister Vanlalhlana, Lok Sabha inthlan tura ZPM star campaigner ni bawk chuan, an candidate Richard Vanlalhmangaiha chu party ṭhenkhatin politics-a chirhthehna tur an dap kual nasa tih sawiin, chutiang chu politics-a ramhlui zia a nih thu a sawi.

Vanlalhlana hian April 10, Nilaini khan Aizawl South-III biala khaw hrang hranga vantlang inkhawmah thu sawiin, "Party ṭhenkhat chuan politics-a chirhthehna tur an dap kual nasa hle. Mi tu tute emaw mawng an hiahsak ngei niin a lang a, chutiang mite chu hmanruaah an hmang mek niin a lang. Ram tana an thil ṭha tih tum leh hmachhawp lam sawi uar si loa khingpuite beih ringawt thupuia hman hi politics ramhlui zia a ni," a ti.

Vanlalhlana chuan, ZPM candidate Richard Vanlalhmangaiha chu thlahtu aṭanga ram vei mi leh mi hmingṭha chhungkua an nih thu sawiin, vote turin mipui a ngen a; ZPM party chuan ram rorelnaah Pathian ram tun din an tum avangin dâwt leh thu puarpawléng hmanga campaign ve lo turin ZPM mite a chah bawk.

Minister Lalthansanga pawhin April 10 khan Hachhek biala khaw hrang hranga vantlang inkhawmah thu a sawi a; ZPM-in mi lâr deuh candidate an neih loh chhan zawhna awm ṭhin chhangin, "MP inthlan hi mi lâr thlanna a ni lo a, Parliament-ah ar khuana khuan chiamin awmzia a nei lo. Mipui sorkar kan nih avangin mi chhe ber ban phâk, kan sorkar thlâwp tur, ZPM-a mi nghet leh thawk rim kan ngaihtuah a, Pu Richard-a hi a lo chhuak ta a ni," a ti.

Lalthansanga chuan, "ZPM hian issue base-in central-ah ring kan rawlh dawn a, central sorkar thawhpui a, a ṭul hunah dodal turin candidate kan chhawp chhuak a ni," a ti a; ZPM candidate Richard Vanlalhmangaiha vote turin mipui a sáwm a ni.