BJP hnuaiah democracy a tlu mek - Lalbiakzama

Lok Sabha inthlanpuia Congress party candidate Lalbiakzama chuan nimin khan Lengpui, West Phaileng leh Mamitahte vantlangah thu sawiin, BJP kaihhruai sorkar hnuaiah democracy a tlu mek niin a sawi.

Lalbiakzama chuan, BJP kaihhruai sorkar laipuiin pawisak leh zahpah nei loin Electoral Bond hmangin sum an tuak niin a sawi a, "CBI, ED leh IT department hmangin company liante an tihṭhaih. Political party leader dangte an man khawm a, tunah hian CM ni lai pahnih jail-ah an tàntir mek. Democracy a tlu chhe mek a ni," a ti.

BJP sorkarin news lian zawng zawng an lei zo deuhthaw tawh nia sawiin Lalbiakzama chuan, "BJP fakna channel an ni zo deuhthaw tawh. Democracy leh missionary chhan turin BJP paih ila, NDA i hnâwl ang u," a ti a; amah vote turin mipui a ngen.

INC Candidate chuan, kumina India ram inthlanpui anga khawvel ram dangin an ngaihven a awm ngai lo nia sawiin, "Mother of Democracy an tih ṭhin India-ah hian khawvel hi an hlauthawng tawh. Opposition party hruaitu man khawm rup rupa jail-a dah hi Myanmar leh Afghanistan tih âwm tak a ni a, India democracy a nghîng nasa hle a ni," a ti.

MPCC president Lal Thanzara pawhin thu sawiin, "Kan hma lawk MP inthlan tur hi ram hruaitu kan thlang dawn a ni ngawt lo a, chanchin ṭha hrilh darh zel duhtute leh kan Pathian biak-in min suasamsaktu BJP thawhpui NDA-te kan indona a ni," a ti a; an candidate Lalbiakzama vote turin mipui a ngen.

Lal Thanzara chuan, MNF candidate-in a tlin chuan NDA-a a ṭhut tur a sawi chiang a, ZPM candidate-in a ṭhutna tur a sawi thei loh thu a sawi a, "Pu Lalbiakzama, Congress candidate, INDIA bloc-a ṭhu tur hi BJP do ngam tur a ni," a ti.