MNF chuan India ram Kristian sakhuaah siam kan tum - K Vena

Lok Sabha inthlana MNF candidate K Vanlalvena chuan nimin khan Saiha Bazar traffic point-a vantlang inkhawmah thu sawiin, BJP-in India ram Hindu sakhuaah siam an tum laiin, MNF chuan India ram chu Kristian sakhuaah siam an tum niin a sawi.

MNF Candidate chuan, MP a nih chuan hnam hnufual, sakhaw tê zawkte himna leh an dinhmun chawikan chu a tum lian ber pakhat a nih thu a sawi a, "MP pakhat tan a harsa a nih pawhin, nasa takin ka nawr ang a, ka bei nasa hle ang. Pathianin hun a tihah ram ropui tak takte pawh an la kehchhia ang a, hnam tlem zawkte pawh kan la ding chhuak ang. BJP chuan India ram hi Hindu sakhuaah siam an tum a, MNF chuan Kristian sakhuaah siam kan tum," a ti.

K Vanlalvena chuan, "Thlan tlin ka nih chuan kan ram, kan hnam leh sakhaw humhalhna kawngah nasa takin hma ka la ang," a ti a; hmun hrang hrangah Zo hnahthlakte hmasawn thei loin an awm reng nia sawiin, "Rorelna pakhat hnuaiah chuan awm ila, hnam ropui tak, khawvelin a hriat kan ni thei," a ti bawk.

MNF senior vice president Dr R Lalthangliana pawhin thu sawiin, "K Vanlalvena hi enchhin ngai lo, kum thum leh thla riat kan enchhin tawh a ni a, mipui pawhin tu nge a nih kan hre chiang tawh hle. Parliament-ah experience nei ṭha, central sorkara official leh politician hmelhriat nei ṭha, inzir chawp ngai lo a ni," a ti.

Dr R Lalthangliana chuan, MNF candidate chu candidate dangte nena khaikhinin a ṭha ber niin a sawi a, "Kan unaute thlavâng nasa takin a hauh a, communist rorelna ang maiin Manipur-ah kan Zo hnahthlak unaute tan Parliament-ah nasa taka au chhuak awm chhun a ni," a ti a; an candidate chu hnam thinlung pú, ram leh hnam hmangaihtu niin a sawi.