ILP endik danah ruahmanna felfai siam a nih theih nan MZP-in hmalak an rêl

Mizo Zirlai Pawl (MZP) rorelna sang ber dawttu Federal Council Sitting vawi 47-na nimina School Education Directorate conference hall-a neih chuan, Inner Line Permit (ILP) endik danah sorkarin ruahmanna felfai zawk a siam theih nan hmalak an rêl.

MZP Federal Council chuan, "Sairang thlenga rél a lo luh thuai dawn avangin sorkarin Inner Line Permit check dan turah ruahmanna felfai zawk a siam theih nan MZP-in hma la rawh se," an ti.

Rorel inkhawm hi MZP vice president C Lalremruata'n a kaihruai a; MZP president H Lalthianghlima chuan, MZP-te'n ram leh hnam tan ngaihtuahna an sên thar a ngaih thu sawiin, "Zirlaite thlavâng hauh tur leh thil dik lo siamṭha turin i in sang mar ang u," a ti.

MZP President chuan, tun hnaiah hna lak dan dik lo an hre chhuak nasa tih sawiin, "MZP hian dodal ila, siamṭhatu tur dang an awm lo," a ti a; buaina vanga Mizoram pantute chu hriatthiam an ngaih thu leh indawh tawn a ngaih thu a sawi bawk.

MZP Federal Council Sitting-ah hian MZP Headquarter hruaitu te, sub-headquarters, branch, hnam pual zirlai pawl leh college students union aiawhte an tel a ni.

MZP FEDERAL COUNCIL ROREL DANGTE

* Mizoram Education department bik enkawltu tur Mizoram Education Service kan neih ngei theih nan MZP-in chak zawkin hma la rawh se.

* Mizo zirlaite ruihhlo laka kan fihlim theih nan MZP-in hma la rawh se.

* Ram pum huapin career awareness neih a nih theih nan MZP-in hma la rawh se.

* Mizoram zirnain hma a sawn theih nan tuna hman mek kan syllabus hi zir chian a, a ṭul anga hmalak ni rawh se.

* Zo fate sumdawnna leh inchîmralna kawnga kan him tlân theih nan MZP hian zirchianna leh inhrilhhriatna nei se, a ṭul anga hmalak ni rawh se.

* Mizoram schedule tribe list ennawn a nih theih nan chak taka hmalak ni rawh se.