Ram tan Mosolman-te an ṭawngṭai

Nimin kha Muslim ho thla thianghlim Ramadan tàwpna, Id-Ul-Fitr a ni a, Mizoram hmun hrang hranga Mosolman-te chu nimin zing karah khan an ṭawngṭai.

Mosolman-te hi khawvel pumpui, India ram leh Mizoramah remna leh muanna a awm theih nan te, hnam leh sakhaw hrang hrang zuitute inngeih taka an chenho theih nante an ṭawngṭai a ni.

Id-Ul-Fitr pual hian Aizawl Mosque Committee & Muslim Welfare Society, Mizoram general secretary Mamon Majumdar chuan thuchhuah a siam a; Mizorama Mosolman awmte chu inner line permit (ILP) ngai pawimawh tura chahin, "Mizorama kan awm chuan ILP nung kan neih ngei a ngai a, ILP neih loh vanga police-te man ngaia awm hi a zahthlak. ILP nung ngei nei turin ka ngen che u a, kan lehkhabu thianghlim Quran-in a sawi angin dan kan zâwm tur a ni," a ti.

Mamon Majumdar chuan, ruihhlo kaihhnawiha mi man an awmin Muslim pakhat tal an tel ziah chu pawi a tih thu sawiin, "A zahthlak tak zet. Khawngaih takin hetiang sumdawnna hlauhawmah hian inhnamhnawih lo turin Mizorama Muslim-te ka ngen. Kan member-te pawh hetiang thil ti leh inhnamhnawih hriate chu sorkar hotute leh police-te hnenah hriattir vat turin ka ngen bawk che u a ni," a ti.

Mizoram hmun hrang hranga Id-Ul-Fitr an hmanna tura puitu khawtlang hruaitute leh police-te chungah an lawm thu a sawi bawk.