Union Minister-in BJP manifesto a tlangzarh

Sorkar laipuia External Affairs minister Dr S Jaishankar chuan nimin khan Hotel Regency-ah Lok Sabha inthlan awm tura Mizoram BJP manifesto a tlangzarh.

S Jaishankar chuan, Mizorama vawi khat a kalna a nih thu sawiin, "Ka rawn kal hnuhnunna ber tur a ni dawn lo. BJP thláwp turin ka ngen che u. MP inthlan awm turah candidate duhthusam in nei. Lotus in hmeh a, kan candidate in thlan tlin chuan in state-in hmasawnna a hmu mai ni loin, ram chhung leh páwn thlengin in tan hun ṭha a inhawng ang," a ti.

Covid-19 avangin hriselna chu an ngaih pawimawh ber a ni lo thei lo nia sawiin Jaishankar chuan, "Ayushman Bharat card hmangin mi tinin free medical treatment Rs 5,00,000 - 10,00,000 thleng an dawn theih nan hmalak a ni ang. ZMC pawh tihchangtlun a ṭul," a ti a; an candidate thlan tlin a nih chuan district hospital zawng zawng thuam ṭhat a nih tur thu a sawi.

Union Minister chuan, prime minister Narendra Modi kaihhruaina hnuaiah India ramin nasa takin hma a sawn nia sawiin, "Narendra Modi thâ tichak turin MP rawn thawh ve turin kan duh che u," a ti.

Mizoram BJP president Vanlalhmuaka chuan, S Jaishankar-a'n Mizoram a rawn tlawh chuan a ṭha zawngin thil a thlen ngei a rin thu sawiin, "BJP leh Modi sorkar mipuite'n an hriat chian phah ngeiin ka ring. PM Modi thlawp turin Mizo mipui ka sáwm a ni," a ti a; Mizoram hmun kilkhawr ber thleng pawha hmasawnna a thlen theih nan MP atan amah vote turin Mizoram mipui a ngen.

BJP MANIFESTO ṬHENKHAT

▶ Sorkar sikul thawm ṭhatna atan cheng vbc. 300 leh sorkar college thawm ṭhatna atan cheng vbc. 450 ruahman a ni ang.

▶ Pachhung University College hi central university puitling a nih theih nan hma kan la ang.

▶ Mizorama loneitu/kuthnathawktute khai chhuahna atan cheng vbc. 1,000 dahin, Mizoram Agri-Infra Mission kan din ang.

▶ Mizorama kuhva thar awlsam zawka hralh a nih theih nan kuhva tawlhrûk dona atan unique identification siam a ni ang.

▶ Cheng vbc. 950 rinchhanin Mizoram Rural Infrastructure Mission leh cheng vbc. 400 rinchhanin Mizoram Urban Development Infrastructures Mission din turin hma kan la ang.

▶ Aizawlah Mizoram Pride Mualzavata Museum leh Lungleiah Darthawma Museum sak a ni ang.

▶ MP atan Vanlalhmuaka thlan tlin a nih chuan central minister-ah dah a ni ang.