KHAWTHLIR

KTP-in thisen pe

KṬP, Zuangtui Pastor Bial chuan nimin khan Synod Hospital blood bank tan thisen unit 42 an pe a, petute mipa 34 leh hmeichhia pariat an ni. YMA, Lunglei Bazar Veng Branch pawhin Lunglei Civil Hospital tan unit 30 an pe a, petute mipa 24 leh hmeichhia paruk an ni.

BLO tan training

Lok Sabha inthlanpui atan nimin khan Khawzawl district election officer K Lalrohlua kaihhruaiin booth level officer (BLO)-te tan training buatsaih a ni a, Khawzawl district-a vote tla 70% a tlin theih dan tur an sawiho. DEO chuan, vote tla a ṭhat theih nan ṭhahnemngaihna nen an bial chhungah ṭheuh hma la turin BLO-te a ngen.

KPP intawhkhawm

Mizoram Presbyterian Kohhrana Kohhran Pavalai Pawl (KPP) ram pum huap intawhkhawm vawi rukna chu zanin hian East Lungdarah ṭan a ni dawn a, vawiin hian palaite'n East Lungdar an pan ang. Inkhawmpui thupui chu 'A chhe lai siamṭhatu' tih a ni a, speaker Rev. C Zorammawia, Synod senior executive secretary-in a sawi dawn. Pathianni zanah hian inkhawmpui a ṭiak ang.