MP thlan atan inbuatsaih mek zel; District ṭhenkhata home voting kalpui mek

April 19, 2024-a Mizorama Lok Sabha inthlan turah ngawrh takin inbuatsaih mek a ni a; district hrang hrangah electronic voting machine (EVM) thliar fel mek niin, home voting kalpui mek zel a ni bawk.

Vote thlâk tura polling station-a kal harsat - rualbanlote leh kum 85 chung lamte chu postal ballot hmangin an in lamah vote thlâktir ṭhin an ni a; tun ṭuma MP thlanah hian home voting ti tura pawm mi 2,125 awmin, kum 85 chung lam mi 1,823 leh rualbanlo mi 302 an ni.

Nimin thlenga dinhmun angin, Mizorama district 11 zingah Aizawl, Lunglei, Siaha, Kolasib, Mamit, Saitual, Khawzawl leh Hnahthial district-ahte home voting zawh a ni tawh a; Champhai, Serchhip leh Lawngtlai district-ahte zawh a la ni lo.

Champhai district-ah nimin aṭang khan Lok Sabha inthlanpui atan home voting kalpui ṭan a ni a, April 15 thleng neih a ni dawn. Serchhip district-ah pawh April 11, Ningani aṭang khan home voting ṭan a ni a, vawiinah zawh tum a ni. Lawngtlai district-ah pawh vawiinah zawh a ni ang.

Lok Sabha inthlan atan hian district hrang hrangah EVM leh VVPAT-te thliar fel mek zel a ni a; inthlan kaihhmawiha tih tur pawimawh neite pawh training neihpui chhoh zel a ni.

Inthlan atana inbuat-saihna hrang hrangte chu Election Commission of India-in a ruat general observer, expenditure observer leh police obser-verte'n an vil reng bawk.

Lok Sabha inthlan turah hian Mizoramah voter 8,56,364 an awm a, mipa 4,14,805 leh hmeichhia 4,41,559 an ni.