Police post ruak hnawhkhat turin CM ngen

Mizoram Police Subordinate Officers’ Association (MPSOA) hruaitute chuan nimin khan chief minister Lalduhoma a pisaah an kâwm a, police post ruak hnawhkhat turin an ngen. Chief Minister's Relief Fund-ah Rs 20,000 an chhûng lut nghal bawk.

MPSOA hruaitute chuan, district hrang hranga subordinate police indaih lohna chu post 4,356 a nih tawh thu sawiin, "Inthlan lai phei chuan police station-ah mipui rawngbawl hna thawktu tur an awm mang lo mai ang tih a hlauhawm," an ti a; a rang lama police post ruakte hnawhkhah a nih theihna atana hma lakpui turin CM an ngen.

Anti Corruption Bureau (ACB)-a deputation post an neih ve chhunte luah khah loa awm ṭhin chu pawi an tih thu sawiin MPSOA hruaitute chuan, "Mizorama corruption donaa hnu chhuitu ber ACB thuam chak lehzual a ṭul hle. Subordinate police-te promotion hun rei tak tak a tangkhang ṭhin pawh siamṭhat a ngai," an ti a, an kaisanna tàn reina chhante an sawi.

Chief Minister chuan, hnu chhuinaa pawimawh zual Cyber Crime Police Station leh corruption chhuitu ber ACB-te chu thuam chak ngai a tih thu a sawi a; sorkar sum dinhmun hmasawn dan azirin thawktu indaih lohna pawh an ngaihtuah zel tur thu MPSOA hruaitute lo a hrilh a ni.