MZP-in MPSC Chairman dang dawn

MCS (Combined Competitive) Examination 2023 buatsaih danah thil dik lo a awm ngei nia an hriat avanga MZP-in MPSC chairman JC Ramthanga báng tura an phûtnaah, an hun tiam a tàwp thlenga a bàn loh avangin MZP chuan April 15, 2024 (Thawhṭanni) aṭangin MPSC Chairman pisa kai tur dan an tum.

MZP hruaitute nimina ṭhukhawm chuan MPSC Chairman pisa kai tur dan an rêl a; "April 3, 2024-a MZP Executive Meeting chuan buaina zawng zawng avangin MPSC chairman Pu JC Ramthanga, IAS (Rtd.) chu mawh laa báng turin a lo ngen tawh. April 10-a press conference-ah April 12 ral hmaa báng turin a ngen leh. April 12, Zirtawpni tlai dar 5 thlenga a la bàn loh avangin April 15, Thawhṭanni aṭangin MPSC Chairman pisa kai tur dan ni se tiin rel a ni," an ti.

MZP chuan Combine Competitive Examination-ah thil dik lo a awm nia an hriat bakah, exam dangah thil dik lo a awm nia an hriatte an tarlang a; Mizoram Forest Service post 3 lak turah exam neih vek tawh tawh hnu MPSC-in answer paper an endik dawn loh thu a tarlang leh si tih an sawi bawk.