Democracy leh Constitution humhim turin Lok Sabha inthlan kan hmachhawn - AICC GS

All India Congress Committee (AICC) general secretary Jairam Ramesh, Rajya Sabha MP chuan, democracy leh Indian Constitution humhim turin Lok Sabha inthlan an hmachhawn niin a sawi a, hmarchhak state-a tualṭo party (regional party)-te chu BJP thuhnuaiah awm vekah a puh.

Jairam Ramesh hian nimin khan Hotel Regency-ah thuthar thehdarhtute a kâwm a; Lok Sabha inthlan tur chu India democracy a dinchan zel dawn leh dawn loh, Constitution humhim a nih dawn leh dawn loh leh Freedom of Speech a din khawchhuah zel dawn leh dawn loh lanna tur nia sawiin, "Tun ṭum inthlan tur hi inthlan satliah a ni lo. Democracy leh India Constitution humhim turin inthlan kan hmachhawn a ni," a ti.

BJP-in sakhua leh hnam nunphungah ang khat veka India ram kalpui an duh nia sawiin Jairam Ramesh chuan, "Congress party chuan hnam leh sakhaw hrang hrangte humhim kan duh. Manipur hi RSS agenda rawn inṭanna a ni a, mi 100 chuang an thi a, mi nuai dáwn an raltlan a, biak-in 100 chuang tihchhiat a ni," a ti a; Manipur buai chhanah BJP kaihhruai sorkarin buaina chinfel tum loin Meitei leh Kuki-te a puh thu a sawi.

AICC General Secretary chuan, Manipur-ah buaina nasa tak a awm chungin prime minister Narendra Modi-a'n a tlawh duh lo tih sawiin, "Manipur CM leh MLA-te pawh a be duh lo. BJP hian inhuatna leh inṭhen hranna politics an khel a, Manipur hi an bul ṭanna a ni. Nakin lawkah Mizoram leh hmarchhak state dangah a thleng ve thei reng. BJP sorkarin policy leh dan a siamte hi hmarchhak state-te tan a him lo," a ti.

Jairam Ramesh chuan, free movement regime (FMR) chu kum 2018-ah BJP-in an siam a nih thu sawiin, "BJP thoin an ṭhiat leh daih. Anmahni siam ngei pawh chhuanlam ho tê tê hmangin an ṭhiat leh a, buaina awm chinfel tum si loin, ram dang an puh. Act East Policy an sawi a, hmalakna tak tak an nei lo. Hmalakna a hnêkin FMR an titawp leh daih a ni," a ti a, Congress sorkar lai chuan insumdawn tawnna atan theihtawp an chhuah niin a sawi.

Lok Sabha inthlan turah Congress kaihhruai INDIA chu chiang takin an chak dawn nia sawiin AICC GS chuan, "Kum 2004-ah pawh tu mahin kan sorkar an ring lo, party zingah seat la hnem ber niin sorkarna kan siam. Kum 2009-ah pawh mi rin hlawh lo chungin sorkarna kan siam a, kuminah pawh kan siam leh dawn. Kum 10 chhung BJP lemchan leh an thutiam hlen loh hi mipuite'n an ning tawh," a ti.

Jairam Ramesh chuan hmarchhaka regional party-te chu BJP thuhnuaia awm vek an nia sawiin, "ZPM emaw MNF candidate in thlan tlin chuan NDA lamah an ṭhu dawn. ZPM candidate in vote chuan BJP in vote ang tho a ni. Congress party chiah hi BJP thuhnuaia kûn lo leh kûn ngai lo tur an awm," a ti a; BJP laka himna turin Congress candidate vote turin Mizoram mipui a sáwm.

AICC General Secretary hian Lok Sabha inthlan atana an party manifesto a tlangzarh nghal a ni.