MTOA-in an harsatna Governor an hrilh

Mizoram Truck Owners’ Association (MTOA) hruaitute chuan nimin khan Governor Dr Hari Babu Kambhampati chu Raj Bhavan-ah an kâwm a; Bairabi rél chawlhhmuna rél lut leh chhuak mumal lo tak vanga harsatna an tawh thu sawiin, sutkian dan kawng zawnsak turin an ngen.

MTOA hruaitute chuan, an pawl chu member 150 vel an nih thu leh truck 300 vel an inziak luh thu an sawi a, "Bairabi rail-head aṭanga Mizoram hmun hrang hranga buhfai dah khâwlna hmunah buhfai phur turin FCI contractor-te hnuaiah kan inhlawh a, tun dinhmunah rél luh leh chhuah dante a mumal lo. Hei vang hian truck neitute'n harsatna nasa tak kan tâwk mek a ni," an ti a; an harsatnate sutkian a nih theih nan Railways hotute leh FCI hotute biaksak turin Governor an ngen.

Governor Hari Babu Kambhampati chuan, MTOA hruaitute thu thlen leh an harsatna tawh chungchangah a ṭul anga hmalak a tum thu a sawi a; MTOA hruaitute chu North-East Frontier Agency (NEFA), Guwahati General Manager hmu tura ràwnin, recommendation letter a ziahsak a ni.