Aizawlah SVEEP Bike Rally an huaihawt

Systematic Voters Education & Electoral Participation (SVEEP), Aizawl district chuan Lok Sabha inthlanpui pualin April 11, Ningani zing khan Aizawlah Bike Rally an huaihawt a, Bawngkawn Brigade Field aṭangin Aizawl district election officer Nazuk Kumar, bawrhsapin a vailiam.

SVEEP Bike Rally-ah hian chief electoral officer (CEO) Madhup Vyas hoin Matchlezz Motor Cycle Club, Mizoram leh Biker Girls, Mizoramte Brigade Field aṭangin Silaimual thleng an tlân a ni.

CEO Madhup Vyas chuan, Mizoramah MLA inthlana vote a tlak ṭhat viau laiin, MP inthlanah a hniam ṭhin chu ngaimawh a ṭul thu a sawi a, "Mipui zingah, a bik takin khawpuia chengte zingah vote hlutna leh vote neite pawimawh hriat thar leh a ṭul," a ti.

Aizawl DEO Nazuk Kumar chuan, "Vote thlak hi vote nei tawh phawt tan chuan kan dikna chanvo a nih a ni a, kan tihhlawntlin ngei ngei tur a ni," a ti a; biker-te chu ṭhalaite zingah vote thlak thuchah puanzarpui turin a sáwm.