Congress manifesto-ah secular dah pawimawhna tur a awm lo - BJP thupuangtu

13th April, 2024

BJP, Mizoram Pradesh thupuangtu Lalremsangi Fanai chuan nimin khan Aizawl Press Club-ah thuthar thehdarhtute a kâwm a; Congress party manifesto-ah secular dah pawimawhna tur emaw, secular tih sawi rîkna a awm lo niin a sawi.

Lalremsangi Fanai chuan, Congress party-in April 5, 2024-ah Lok Sabha inthlanpuia an manifesto an tlangzarh tih sawiin, 'Kan ti ang' tih intiamna point 300 chuang an ziak tih a sawi a, "Congress manifesto-ah hian secular dah pawimawhna tur emaw, secular tih sawi rîkna hmuh tur a awm lo. An ziah lan awm chhun chu 'BJP leh a thawhpuite hian sakhaw hrang betu, hnam leh hnam inkar leh ṭawng hrang hmangte inkarah inhuatna an pu darh' tih zawng a ni," a ti.

BJP thupuangtu chuan, Mizorama Congress party hotute'n BJP chu Kristiante min nuai chimih tumtu, secular (zakhaw zalenna) paih bo tumtu, Uniform Civil Code kalpui tumtuah an puh ṭhin thu te, Article 370 lâk kian chungchang sawi zawma Mizo mipui sawi ṭhaihna ṭawngkam an chhâk chhuak fo chu ṭha lo an tih thute a sawi.

Lalremsangi Fanai chuan, "India rama Kristiante nasa taka nêkchèpna leh nuai chimih tumna thleng anga an tlangau pawh hi opposition an niha an auhla solfa ki pangngai reng, ruling an nih veleha an thúlkhung that ṭhin a ni," a ti a; BJP candidate Vanlalhmuaka chu sorkar laipuiin nihna pawimawh tak a pek tur, Mizoram leh mipuiin hmasawnna an dawn theihna tur nia sawiin, vote ṭheuh turin Mizoram mipui a sáwm a ni.

MIZORAM BJP TARLAN ṬHENKHAT

◆ PM Modi sorkarna hnuaiah Mizorama Congress sorkar leh MNF sorkar chu duhsakna tinreng luang liam khawpa vûr a ni a, ZPM sorkarna rei lo te chhungin CSS cheng vbc. 1,000 a pe hman tawh.

◆ BJP sorkar kum 10 chhungin India mipui tinin zalenna 'Freedom of Speech' kan nei vek.

◆ Indira Gandhi emergency 1975-1977 hun lai khan press mite leh mipui rapbeta opposition party hruaitute hleilenna kha India leh khawvel mipuite'n kan theihnghilh lo.

◆ Candidate paruk zinga Congress candidate Pu Lalbiakzama chauh lo chu ruling bench BJP sorkarna lama ṭhu a, BJP thawhpui thei, BJP thian ṭhaa neih tum vek tur niin an lang.