Saitual dist-a critical PS-ah sipai dah tawh

Saitual district election officer Dr Lalngura Tlau, district bawrhsap chuan nimin khan chanchinbumite a kâwm a, Lok Sabha inthlanpuia inbuatsaihnate a hrilhfiah.

DEO sawi danin, April 8, 2024 khan Saitual district-a duty tur central armed police force (CAPF) anga duty tur Indo Tibetan Border Police (ITBP) an thleng tawh a; nimin khan state armed police force-te thleng tura beisei an ni.

April 10, 2024 aṭangin Keifang Kualmawiah niléng zankhuaa sipaite duty-na tur Naka checkpost siam a ni a; critical polling station - Mimbung-I, Mimbung-II, NE Tlangnuam, Khawlian-I leh Khawlian-II ahte CAPF section khat ṭheuh dah an ni tawh bawk.

Dr Lalngura Tlau chuan, Saitual district-a khaw 51-ah home voting kalpui a nih thu sawiin, "Home voting-ah hian kum 85 aia upa mi 135 leh rualbanlo mi 48-in vote an thlâk a, mi 11-in vote an thlâk lo a, vote thlâk lote hi inentira zin an ni tlangpui," a ti.