Aizawlah thiamthil zirna khâr

School Education Directorate conference hall-ah nimin khan thiamthil chi hrang hrang zirna, Model Centre for Critical Life Skill and Occupational Skill Deve-lopment programme khâr a ni a; School Education secretary Lalzarmawii'n a hmanpui.

Training-ah hian mi 176 inziak lutin, mi 137-te'n an zo a; basic literacy, digital literacy, financial literacy, commercial skill, child care and education, health and family welfare, political & constitutional awareness leh disaster management-te zirtir an ni.

Lalzarmawii chuan, Programme-in a tum ber chu ziak leh chhiar thiam lo thiamtir a, an thiamna thlah tawh loa an vawn dan tur leh, an ni tin nuna harsatna thleng ṭhinte hmachhawna inhai chhuak thei tura buatsaih te, an theihna hai chhuahsaka tihhmasawn leh eizawnna ngêlnghet nei thei tura training pek a nih thu a sawi.

Critical Life Skills and Occupational Skill Development Programme hi kum 2021-22 aṭangin kalpui a ni a, kum 2023-24 thleng khan mi 393 an inziak lut tawh. Mi 331-in hna hrang hrang - housekeeping, hotel & restaurant workers, eisiam, pickle & jam siam, pheikhawk chhe ziam, nihliap chhe siam, lumeh, pangpar khàwi, beauty culture, puantah, house/electric wiring leh puanṭhuite an zir chhuak tawh a ni.