Inthlan atana inbuatsaihna hrilhfiah

Khawzawl district election officer K Lalrohlua, bawrhsap chuan nimin khan DC conference hall-ah thuthar thehdarhtute kâwmin, Lok Sabha inthlanpui atana inbuatsaihna leh ruahmannate a hrilhfiah a; Tuichang North MPF Forum President leh YMA Sub Headquarters President ten an ṭawiawm.

Khawzawl district-a Tuichang bial-ah polling station 28 a awm thu sawiin DEO chuan, "Polling station pakhat atan EVM pakhat ṭheuh thlan a ni tawh a, thlavéng atan control unit 15, ballot unit 15 leh VVPAT 18 ruahman a ni," a ti a; Khawzawl district-ah home voting ti thei mi 109 zinga mi 107-in vote an thlâk tawh thu a sawi.

Bawrhsap chuan, MLA inthlanpui 2023-ah tlawmngai pawl, kohhran leh chanchinbumite nena an ṭanrualnain rah ṭha chhuahin, kum 2018-a vote tla aiin vote 5% velin a sang tih sawiin, "Lok Sabha inthlanah pawh hian kan thawhho tawhna ṭha tak hi chhunzawm leh turin ruahmanna hrang hrang siam a ni," a ti.