Vai hmaa zâm loa ding tur Mizoramin a mamawh lai a ni - Lalchhandama Ralte

MNF vice president Lalchhandama Ralte chuan, kumina Lok Sabha inthlan tur chu sakhaw humhim tura mi huaisen, vaiho hmaa zâm loa ding tur Mizoramin a mamawh hun lai a ni a, hun danga inthlan aiin a pawimawh niin a sawi.

Lalchhandama Ralte hian Chalfilh bial chhunga khaw hrang hranga a campaign-naah thu sawiin, "Lok Sabha inthlanpui vawi 18-na hi hun danga MP inthlan aiin a pawimawh. Kan ram leh hnam, kan sakhua humhim tura mi huaisen, vaiho hmaah pawh zâm loa ding tur Mizoramin a mamawh hun lai ber a ni," a ti a, political party ṭan zawng dahṭhaa MNF candidcate K Vanlalvena vote turin mipui a sáwm.

MNF adviser leh MLA Robert Romawia Royte pawh Hachhek bial chhungah campaign in, "Kohhran inzawmkhawm pawlte leh NGO-te duh danin corruption laka fihlim, Kristiante thlavâng hauh ngam, ram leh hnam tana Parliament chhung leh páwna huaia taka ding ngam kan thlan a pawimawh," a ti a; Mizo ram, hnam leh sakhaw himna tur thlan a pawimawh thu a sawi.