Mizoramah K-pop ko lutin, Korean zirna din turin hma ka la ang - K Vena

Lok Sabha inthlan tura MNF candidate K Vanlalvena chuan, Lok Sabha MP-ah thlan tlin a nih chuan Korean zaithiamte Mizo ṭhalaite'n an ngainat avangin Mizorama koh luh leh Korean ṭawng zirna Mizorama din tura hmalak a tum thu a sawi.

K Vanlalvena hian nimin khan Darzo, Hnahthial, Thiltlang, Pángzáwl leh Chhiahtlangte a tlawh a; vantlang inkhawmah thu sawiin, "Korean zaithiam K-pop te hi ṭhalaite'n an ngainatzia kan hre ṭheuh a, Mizoramah ko lutin, Korean ṭawng zirna institution din turin hma ka la ang," a ti.

Lok Sabha MP atan thlan tlin a niha a ngaih pawimawh hmasak, tihhlawhtlin ngei a tumte sawiin Vanlalvena chuan, "Mizoram tana ka hmalakna hrang hrangte tihhlawhtlin theihna tur chuan central sorkar leh ZPM sorkar pawh ṭha takin ka thawhpui ang," a ti a; Mizo ṭhalaite eizawnna dapsak te, buh leh bâla intodelh tura kut hnathawktute dinhmun chawisàn te, ran vulhtute tana hmalakna tur te, border trade-te chu a hna pui ber tur a nih thu a sawi.

K Vanlalvena chuan, lehkhathiam leh thiam lote eizawnna a ngaih pawimawh thu sawiin, Gujarat-a diamond siamnaah lehkha thiam lote diamond nâwt tlêin tam tak an hlawh ṭhin thu a sawi a, "Hetah hian Mizo ṭhalaite training pe a, an luh theih nan hma ka la ang. India ram leh khawvel hmun hrang hrangah company leh hnathawhna hmun hrang hrangah an luh theih nan nasa takin ka bei ang," a ti.