COVID-19: Mizoram dinhmun Hripui vei mi 9 hmuh belh a ni
December 8, Thawhlehni khan Mizoramah Covid-19 vei mi pakua hmuh chhuah a ni a, nimin khan hripui vei enkawlna hmun aṭangin mi 10 chhuahtir an ni thung.
Covid-19 vei hmuh chhuah tharte chu mipa pariat leh hmeichhia pakhat an ni a, TrueNAT-PCR hmanga hmuh mi panga leh Rapid Antigen Test (RAT) hmanga hmuh mi pali an ni. ZMC laboratory-a sample endik zingah hripui vei an awm lo a, Aizawl district chhungah hmuh belh an awm lo.
Nimin khan hripui laka fihlîm tawh mi 10 chu enkawlna hmun aṭangin chhuahtir an ni a; Aizawl district-ah paruk, Champhai district-ah pakhat leh Serchhip district-ah pathum chhuakin, an zingah kum 87 mi a tel.
Mizoramah Covid-19 positive mi 3,977 hmuh chhuah a ni tawh a, mipa 2,930 leh hmeichhia 1,047 an ni. Nimin tlai dar 5 thleng khan mi 3,782 (95.10%) chhuahtir an ni tawh a, mi paruk (0.15%) thi tawhin, enkawl mek mi 189 (4.75%) an awm.
Mizorama Covid-19 positive hmuh chhuah tawh mi 3,977 zinga mi 1,877 chu Mizoram chhunga kái an ni a, mi 2,100 chu state páwn aṭanga rawn lût an ni.