KHAWTHLIR

KPP khawmpui tan

Mizoram Presbyterian Kohhrana Kohhran Pavalai Pawl ram pum huap intawhkhawm vawi rukna chu nizan khan East Lungdar khelmual pandalah ṭan a ni a, nizan dar 6:20 thleng khan palai 4,221 an thleng tawh. Inkhawmpui thupui chu 'A chhe lai siamṭhatu' tih a ni a, speaker Rev. C Zorammawia, Synod senior executive secretary-in a sawi ang. Pathianni zanah hian inkhawmpui a ṭiak ang. Intawhkhawmna atana pandal sak chu March 31, 2024 zinga thli tlehin an lên chim a, ni 10 chhungin an sa zo leh a ni.

EVM thliar

Nimin khan Khawzawl leh Hnahthial Lok Sabha inthlana hman tur electronic voting machine khawl hrang hrangte thliar felna hun hman a ni. EVM leh VVPAT thliarna hunah hian inthlan kaihhnawiha sorkar hotute leh political party hrang hrang aiawhte an tel a; MP candidate-te hming leh an party chhinchhiahna (symbol)-te Electronics Corporation of India Limited (ECIL) engineer hoin EVM/VVPAT-ah thun a ni.

Inthlan tan training

Lunglei DC conference hall-ah nimin khan Lok Sabha inthlan tura polling party-te hnena EVM leh lehkha/ hmanraw pawimawhte lo pe chhuaktu tur despatch team leh vote thlak zawha polling party-te an haw huna EVM leh hmanruate lo dawngsawngtu tur receiving team-te tan training buatsaih a ni. Lunglei district-ah hian polling station 176 a awm a, chu'ng zinga 13 chu hmun hla zuala awm a ni.

SVEEP campaign

Champhai District Election Office leh MZP Headquarters, Champhai chuan nimin khan Champhai College-ah zirlaite pualin inthlan kaihhnawih thil inzirtirna leh vote thlak tura hmalakna, Systematic Voters Education and Electoral Participation campaign an buatsaih a, district election officer James Lalrinchhana'n a hmanpui. DEO chuan, vote thlak ní chu sorkarin chawlha a puan bakah, vote thlak tura haw duh zirlaite tan April 18, 2024 chu Higher & Technical Education department-in chawlh a phalsak tih a sawi.