AMC sorkar kal mek hun a tâwp Administrator-in a enkawl rih dawn
Aizawl Municipal Corporation (AMC)-a mayor PC Lalhmingthanga kaihhruai sorkar term chu nizan zanlai khan a tâwp a, councillor mi 19-te chu vawiin aṭangin councillor an nihna a tàwp. AMC-a rorelna hi Commissioner-in a kengkawh nghal ang.
Mizoram sorkara UDPA Minister sawi danin, AMC councillor-te leh sorkar term chu nizan zanlai khan a tàwp a; chutih laiin, nimin thleng khan State Election Commission (SEC) chuan inthlan a la puang lo. AMC inthlana hman tur electoral roll buaipui mek a la ni.
AMC sorkar kal chhoh dan
• November 16, 2010-ah AMC sorkar hmasa ber lak luh a ni a; chairman-ah CT Zakhuma, vice chairman-ah Zarzoliana, executive councillor-ah Lalzirliana, Lalhuthangi leh Hmingthanzami te lâk luh an ni.
• July 22, 2014-ah AMC sorkar bûk a ni a, CT Zakhuma kaihhruai sorkar ding lai a tla.
• July 30, 2014-ah Zarzoliana kaihhruai AMC sorkar thar a piang a; vice chairman Lalrinenga Sailo leh executive councillor (EC)-ah C Lalsawivunga, W Chhuanawma leh Lalmalsawmi te lak luh an ni.
• Zarzoliana kaihhruai AMC sorkar chu February 10, 2015-ah bûk niin, a tla ve leh.
• February 12, 2015-ah chairman hmasa ber CT Zakhuma kaihhruai sorkar a piang leh a; vice chairman-ah C Lalsawivunga, EC atan Rosiamngheta, Lalzirliana leh Hmingthanzami te lak luh an ni.
• Aizawl Municipal Council (AMC) tih ṭhin chu October 15, 2015 aṭangin Aizawl Municipal Corporation tia thlak a ni. Corporation a nih aṭangin chairman leh vice chairman tih ṭhin chu mayor leh deputy mayor tih a ni a, EC tihbo a ni.
• September 2019-a Legislative Assembly session-ah 'The Mizoram Municipalities (Amendment) Act, 2019' pass a ni a, December 11, 2019-ah Government Gazette-ah chhuah a ni. Dan siamṭhatah EC pali awm thei tura tih a nih angin, K Romawia, R Lalbiakthanga leh C Lalthansanga te EC atan September 21, 2020-ah lak luh an ni.
• December 10, 2020-ah kum 2015-2020 chhunga AMC sorkar term a tâwp a, administrator K Laldingliana, AMC commissioner-in a enkawl zui rih ang.