Motor insurance document lem siam thubuaiah mi pasarih man
Mizoram Police chuan Transport department-in report (FIR) an thehluh bawhzuiin tun hnai khan motor insurance document lem siam vangin mi pasarih an man. Mi mante hi mipa pali leh hmeichhia pathum an ni a, Aizawla cheng nia inchhál vek an ni.
Police-te chuan an mi mante chu court-ah hruaiin, thu zawhfiah atan darkar 74 kawl an dil a, court-in a remti. He thu ziah lai hian police-in an kawl theih hun chhung a la tawp lo. Mi dang inhnamhnawih an awm leh awm loh la chhui zui mek a ni a; document siamna atana an hman ṭhin hmanraw ṭhenkhat pawh man a ni bawk.
Vanglaini-in police aṭanga thu a dawn danin, insurance document lem siam ṭhinte hian siamsak tur an zawng a, a pangngaia siam ṭhinte aiin 30% vela tláwmin an siamsak ṭhin.
Transport department chuan insurance lem chungchangah hian April 10, 2024 khan an Director hmingin Aizawl Police Sta-tion-ah FIR an thehlut a ni.
Transport department chuan, FIR an thehluhah hian tun hma deuh aṭangin lirthei insurance lem a tam thu sawi a ni ṭhin tih an tarlang a, "He thil hi Transport department chuan kan ngai thutak hle. DTO tinte pawh fake insurance certificate an hmuh chu man zel tura hriattir an ni. Chumi kal zelah chuan DTO (RA) chuan March 22, 2024 khan insurance certificate lem an mante a rawn thehlut," an ti.
Transport department tarlan danin, insurance certificate lem hian lirthei neitute a tibuai ṭhin hle. Lirtheiin chhiat a tawh palhin insurance an claim thei lo a, chu chuan harsatna chi hrang hrang a hring chhuak a ni.
Insurance certificate lem zuarte hi social media hrang hrang - Facebook, Whatsapp leh a dangte kaltlangin an inzuar ṭhina hriat a ni.