ZPM party-in thu dik lo hmanga beih kan tâwk nasa - Sapdanga

ZPM hruaitu K Sapdanga, minister chuan, Lok Sabha inthlan tur vuakvêtah ZPM party leh an candidate ten thu dik lo hmanga beih an tawh nasat thu a sawi.

ZPM Ṭhalaiin April 13, Inrinnia Zarkawt kâwna street campaign an buatsaihah K Sapdanga chuan, "Kumina MP inthlan turah ZPM party chuan thu dik tâwk lo hmanga beihna kan tâwk leh ta mawlh mawlh mai. Party naupang tê hian beih kan tâwk nasa em em mai a, amaherawhchu, Pathian leh mipuite kan lamah in ṭang tih kan hriat hian kan thla a timuangin min tichak ṭhin," a ti.

K Sapdanga chuan, an MLA TBC Lalvenchhunga chu car rental chung­changah hmingchhe thei ang bera puh a ni tih sawiin, "Mahse, vawiinah chuan car rental association-in ngaihdam dilna thu mawi tak an rawn tichhuak leh ta zawk a, keini chuan kan ngaidam chiang hle," a ti. An candidate Richard Vanlalhmangaiha chungchangah, "Ṭhenkhatin tute emaw mawng hiatin politics ramhlui zia leh thu belhchian dâwl lo hmang bawkin an rawn bei leh ta," a ti a, thu dik a la rawn lan chhuah leh thuai dawn thu a sawi.

Mizorama party awm mekte zingah ZPM chu thawk rim ber party-a an inchhàl ngam thu sawiin K Sapdanga chuan, "Kan ram tan hian hmasawnna thar leh kalphung thar chhawp chhuah kan duh vang a ni. MP inthlan awm turah pawh hian kan theihtawp kan chhuah a, thu dik lo leh dâwt hmanga eptute bei turin kan inzirtir ve ngai lo," a ti.

Home Minister chuan, "Ram tana kan tih duh leh hmachhawpte kan sawi uar hle a, chutiang ti tur pawh chuan kan theihtawpin kan thawk mek a ni," a ti a; ZPM MP candidate Richard Vanlalhmangaiha chu Pathian zarah leh mipui duhsakna vangin a tlin ngei an beisei thu a sawi.

ZPM Ṭhalai hian Lok Sabha inthlan pualin Aizawla hmun hrang hrangah April 10-13 chhung khan street campaign an buatsaih a, an party aṭanga minister/MLA-te leh party hruaitute'n thu an sawi ṭhin a ni.