Lok Sabha inthlanah mipuiin ZPM vote an ba lo - MNF Adviser

MNF adviser leh Publicity Board vice chairman J Malsawm­zuala Vanchhawng chuan, ZPM party-in thla li chhung sorkarna an chelh tawh chin aṭanga enin, Lok Sabha inthlanah mipuiin ZPM vote zui an ba lo niin a sawi a; MNF candidate vote turin mipui a ngen.

J Malsawmzuala Vanchhawng hian April 13, Inrinni khan Aizawl Press Club-ah thuthar thehdarhtute a kâwm a; December 8, 2023-a lak luh ZPM sorkarin thla li âwrh chhunga an kal dan tur an tichiang tawh nia sawiin, "Ni 100 chhunga an tih tur an puan an bawhzui danah beiseina sang tak nena thlirtu mipui an tihbeidawn chhoh zel avangin MP inthlan awm turah hian mipuite'n vote pêk leh an ba tawh lo," a ti.

Lok Sabha inthlan turah ZPM-in MP candidate an siam danah ram, hnam leh sakhaw himna tura thawh hlâwk tur aiin, sum hai chhuah dan thiam tur lam an dap zawk nia a lan thu leh, kum 2024-25 budget-ah mahni inhai vûrna lam a langsar nia sawiin, ngaihtuahna sêng uluk turin mipui a ngen.

J Malsawmzuala chuan, December 8, 2023-a Chief Minister-in ni 100 chhunga an hmalakna tur a puanah inrenchemna lama hmalak an tum dan - minister/MLA-te leh sorkar official-te'n dan anga an dawn theih chin bak la lo tura an duh thu a sawi tih a sawi a, "An hmalak chhunzawm tâk dan erawhin inrenchemna lam a hawi chhunzawm ta miah lo," a ti.

MNF Publicity Board Vice Chairman tarlan danin, MNF sorkarah CM adviser mi pahnih, SEDP board vice chairman mi 14-te tana sorkarin kum 5 chhunga sum a sên chu Rs 11,58,12,000 a ni. ZPM sorkarah CM adviser panga, committee pahniha vice chairman pahnih leh MLA hamṭhatna tihpunte atana kum 5 chhunga sum sên tur chu Rs 1,14,39,20,000 a ni thung. MNF sorkar aia ZPM sorkara sum sen tur tamna chu Rs 1,02,81,20,000 a ni.

J Malsawmzuala chuan, ZPM sorkarin MLA-te lirthei sorkarin a leisak titawp mah se, MLA tana loan a tihpun avangin nasa takin sum sen tur a tam zawk niin a sawi a, "Inrenchemna na taka kalpui tur anga an insawi laiin, a tak rama an hmalak dan erawh chu a danglam nghal daih. Assembly zawhna leh chhannaa a lan danin, adviser to CM pangate hian staff 34 neiin, sorkarin thla khata sum a sen zat chu Rs 15,27,265 a tling," a ti.

MNF Adviser chuan, ZPM sorkarah CM Office hautak tak din a ni tih sawiin, "Thuneihna zawng zawng CM kuta dah a nih tâk vang a ni ber a, hei hi budget document-in a nemnghet. CM-in engkim inthlun khawmna Finance leh Planning a chang a, budget-a hmathar lakna tur tarlan, capital outlay cheng vbc. 1,953.75 aṭangin CM chan Finance-ah vbc. 1,219.70 dah a ni a, 62% aia tam a ni," a ti a; CSS matching share tur zawng zawng CM kutah a awm vek tih a sawi.

J MALSAWMZUALA SAWI DANGTE

* 2024-25 budget (estimate)-ah loneih leh a kaihhnawiha hmalakna tur (capital expenditure)-ah cheng nuai 8,107 chiah an dah a, MNF sorkar liam tain revised estimate-a a dah nuai 16,916.90 aiin nuai 8,807-in a tlem zawk.

* Sorkar hmasain SEDP sum vbc. 150 a hnutchhiah aṭangin thlai thar leina turin ZPM sorkarin vbc. 110 a dah a, sum awm reng chungin hmunphiah an lei duh lo.

* Sum pûk zat tur tlahniam anga lantir tum vangin ways & means advance (WMA)-ah Rs 3,00,000 chiah budget-ah tarlan a ni a, 2023-24 khan cheng vbc. 1,000 dah a ni. WMA hmanga sum hman lailâwk tur tihtlem vak hi budget ṭha anga lantir tumna, sum pûk tlem anga lan tumna, mipui bumna a ni.

* Budget hmasa berah Mizo development bank leh hydel project chungchang a awm lo.

* Power hman man tih san a nih loh tur thu sawi a nih laiin Power & Electricity department sum thawh chhuah tura chhût cheng nuai 62,000 aṭangin nuai 84,124-ah a pung, a punna nuai 22,124 a tling hian ngaih a tiṭha lo.