KHAWTHLIR
Thisen pe
April 13, Inrinni khan SAY, Central South Division chuan ZMC tan thisen unit 36 an pe a, petute mipa 31 leh hmeichhia panga an ni. KṬP, Ramthar Tlangveng Branch-in an din champha pualin Synod Hospital tan thisen unit 32 an pe a, petute mipa 21 leh hmeichhia 11 an ni. ṬKP, Zawlpui Bial member mipa 23 leh hmeichhia pahnihte pawhin Lunglei Civil Hospital tan thisen unit 25 an pe bawk.
MZP-in dang dawn
MPSC-in MCS (Combined Competitive) Examination 2023 buatsaih danah thil dik lo a awm ngei nia an hriat avangin MZP-in MPSC chairman JC Ramthanga báng tura phutna atan vawiin aṭangin a pisa kái tur dan an tum.
Vote thlâk turin intiam
Systemic Voters Education & Electoral Participation kaltlanga mipui hnena vote thlak pawimawhzia zirtirna Kolasib district hmun hrang hrangah kalpui mek zel a ni a; April 13, Inrinni khan Kolasib Stadium, Project Vengah leh Khuangpuilam Futsal Ground-ah a huhoin vote thlak tura intiamna hun hman a ni.
Kristian Hlabu ennawn mek
Mizoram Presbyterian Kohhran leh Mizoram Baptist Kohhran aṭanga Kristian Hlabu ennawntu committee chu April 11, 2024 khan Synod Office, Aizawlah an ṭhukhawm a; kohhran pahnih aṭanga hlabu ennawn sub-committee ve vete'n ruahmanna an siamte an thlirho. Sub-committee-in an rawtna thlirin, Kristian Hlabua seng luh turin hla eng emaw zat an pawm a, hmalak zel dan tur ruahmanna an siam bawk.
Heroin man
Mizoram Police-te chuan April 12, 2024 tlai dar 6:20 khan Aizawl Venglaiah Lalnunhlima (35) s/o VL Rohlua (L), Ramhlun Vengthar nia inchhál hnen aṭangin heroin gram 19.08 an man. Lalnunhlima lakah hian Aizawl Police Station-ah thubuai ziah luh a ni.
Kum 107 tling
Aizawla pianga seilian zinga upa ber nia chhâl Buangi, Khatla chuan nimin khan kum 107 a tling a, kum 107 a tlinna hi an lawm. Buangi hi Mizo zinga rehabilitation centre-a thawk hmasa ber a ni a, kum 1937 khan Salvation Army enkawl, Kolkata-a chhawmdawlna inah a thawk tawh a ni.
Book of the Year Top-3 an puang
Mizo Academy of Letters chuan kum 2023 chhunga Mizo ṭawng lehkhabu chhuak ṭha ber an thlan mekah a ṭha zual pathum an thlang chhuak tawh a; chu'ngte chu Zaii Khiangte ziah 'Hniak hlu' tih te, Ahmangaihi Khiangte ziah 'Pangparhnima' tih leh, Lalhruaitluanga Chawngte ziah 'Raltiang rimawi' tihte a ni.
Reiek tlang tifai
Mizoram State Legal Services Authority leh YMA, Reiek Branch chuan April 12, 2024 khan Reiek tlang thenfaina hun an buatsaih a; Supreme Court judge pahnih - Justice Ujjal Bhuyan leh Justice Prasanna B Varale bakah, Gauhati High Court judge pathum - Justice Michael Zothankhuma, Justice Nelson Sailo leh Justice Marli Vankung ten an hmanpui.