BJP inhlauhsiakna tuhah Congress puh
BJP Mizoram president leh Lok Sabha inthlan tura candidate Vanlalhmuaka chuan Congress party chu Mizorama BJP inhlauhsiakna tuhtu-ah leh hnam leh kohhran hmanga campaign hreh lo-ah a puh.
Vanlalhmuaka hian April 13, Inrinni khan Champhaia BJP pisaah thuthar thehdarhtute a kâwm a; "Mizoramah hian BJP inhlauhsiakna kan tuh a, BJP hlauhna mipuiah kan tuh zel. Hetiang thu dik lo Zoram mipui hnena thehdarhtu chu Congress party an ni a, anni hi hnam leh kohhran hmanga campaign hreh lo an ni," a ti.
Sorkar laipuia minister neih a hlâwk hle nia sawiin Vanlalhmuaka chuan, "State tin hian union minister neih an tum vek. Mizoram pawhin Dr C Silver-a central minister kan neih laiin RIPANS, Vety College, cancer hemna khawlte bakah kawng tam takin Mizoramin hmasawnna kan nei hman," a ti a; tunah pawh Mizoramin central minister neih theihna hun ṭha a nei nia sawiin, thlan tlin a nih chuan minister a nih dawn avangin amah vote turin mipui a ngen.
Mizoram BJP President chuan, sorkar laipuiin Mizoram a hmangaihzia sawiin, "BJP sorkar hian nasa takin state hrang hrangte hi min ngaihtuahin min hmangaih a, Aizawl-Champhai kawng hetiang em ema ṭha min pe hi central BJP-in kan ram an hmangaih vang a ni. Kan state sorkarah erawh chuan hetianga kawng ṭha hi chu engtikah mah min pe ve thei ngaiin a rinawm loh," a ti.
BJP President chuan, sorkar laipuiin kut hnathawktute kum 60 an tlin hnuah pension scheme ṭha tak a ruahmansak tih sawiin, "Rs 3,000 aṭangin an scheme thlan dan azirin pension a sang chho zel dawn a, hei hi Mizorama kut hnathawktu tam zawk hian kan mamawh tak zet a ni," a ti bawk.