Governor-in Bru Boisu a hmanpui

Aizawla Bru awmte chuan April 13, Inrinni khan Cultural Centre cum Auditorium, Vaivakawnah Bru kût, Boisu an hmang a, Governor Dr Hari Babu Kambhampati-a'n a hmanpui.

Governor chuan, Bru hnam tana hun pawimawh, an kum thar chhinchhiahna Boisu a telpui thei chu lawmawm a tih thu sawiin, "Bru hnamte'n harsatna tam tak an tawh ka tawrhpui. Nimahsela, harsatna kara an tawrhchhelna a fakawm," a ti a, an kal zelna turah duhsakna a hlan.

Dr Hari Babu Kambhampati chuan, sorkar laipuiin scheme hrang hrang a duan - PM Jeevan Jyoti Bima Yojana, PM Suraksha Bima Yojana leh a dangte ngaihven a, mipuite'n zau zawka an hriat theih nan hma la turin Bru khawtlang hruaitute a chah.

India ram ropuina ber chu hnam hrang hrang awmte inpumkhatna a nih thu sawiin Larsap chuan, "Hnam inpumkhatna vawn nun zel a pawimawh. Mi tinte mi dang nunphung, hnam ziate zah thiama nun a ngai a, hnam tin inlungruala kan awmho a ṭul," a ti.

Boisu hi Bru tana kum thar chhin­chhiahna a ni a, kum tin April 13-15 inkarah an lawm ṭhin. Kumina Boisu-ah hian mipa, hmeichhia, naupangte'n zai leh lâmin hun an hmang a ni.