CM-in Innovation Facility Centre a hawng

Mizorama tualchher thiamna nei (local innovator)-te leh technical lam zirna hmuna zirlaite tana kháwl mamawh chhawpsak leh innovation lama hmasawnna tur atana ṭan lakna tura ruahman Innovation Facility Centre (IFC), New Capital Complex-a mi chu nimin khan chief minister Zoramthanga'n a hawng.

Chief Minister chuan, thil thar zawn chhuah leh ngaihtuah chhuahna tur hmun hawn a ni chu lawmawm a tih thu sawiin, "Thufingin 'Mamawhna chu thil thar hmuh chhuahna' tia a lo sawi chu vawiin thlengin a la dik. Mizoramin hma a sawn zelnaah mamawh thar hrang hrang a la awm zel ang a, chungah chuan kan innovator-te'n an ngaihtuahna sénga thil thar ṭha tak tak an siam zel ka beisei. Chu'ng atan chuan vawiina IFC hawn tak hi thil pawimawh tak a nih ka ring," a ti.

Khualzahawm, Commerce & Industries minister Dr R Lalthang­liana chuan, "IFC hi thluak themthiamte mai bakah, zirlaite tan ṭangkai tak a nih ka ring. Zirna tluangtlam pangngai mai bakah, eizawnna kawng hrang hrang ṭha tak tak a awmzia a taka entir tur zirlaite tan chhawp a ni," a ti a; Commerce & Industries department beneficiary tam tak tan pawh ṭangkai tak tur nia a hriat thu a sawi.

Innovation Facility Centre hi project cost chu cheng nuai 667 a ni a; MISTIC Work Advisory Committee kaltlanga a satu tura thlan LB Associates-in February 9, 2018-ah an sa ṭan a, March 5, 2020-ah sak zawh a ni.