'We shall kill them all' tih ka sawi kha ka inchhîr lo - K Vanlalvena

Lok Sabha inthlan tura MNF candidate K Vanlalvena chuan April 13, Inrinni khan Aizawla hmun hrang hrangah street campaign a nei a; Mizoram leh Assam police-te ramria an intihbuai chungchanga 'We shall kill them all' tih a sawi chu a inchhîr loh thu a sawi.

K Vanlalvena chuan, Rajya Sabha MP nia Parliament-a a awm ve tawh chhungin Mizo mipuiin an thlàwp ṭhat avangin a lawm thu leh a thla an timuang a, huaisenna a neih phah thu a sawi a, "We shall kill them all, tih ka sawi kha ka inchhir lo a, ka tih tur tak tiah ka inngai," a ti.

'We shall kill them all' tih a sawi chungchangah ZPM Ṭhalaiin press release siamin amah an chhuanzia an puang tih sawiin Vanlalvena chuan, "Ka lawm ngawih ngawih a ni. Vawiina nuihza siam nana Chief Minister-in khami chungchang a sawi kha chu ZPM candidate ka nih loh vang a ni. ZPM candidate chu ni ila min chhuanzia sawi thiam ber a ni ang," a ti a; Mizoram police-te thil tih chu a phatsan thiang lo tih a sawi.

K Vanlalvena chuan, Zo hnahthlakte'n harsatna an tawh laiin theih tawpin Parlianment House chhung leh páwnah a au ve tawh ṭhin tih sawiin, "Ṭhalai tam zawkin eizawnna an neih theihna tura beih te, loneitute hma lam pan zel theihna tura theihtawp chhuah ka tum," a ti a; Mizo ram, hnam leh sakhua a him theihna tura theihtawp chhuah chhunzawm zel theih nan hnathawh kawr hâktir zel turin Mizo mipui a ngen.

Aizawla street campaign-ah hian MNF treasurer Lalruatkima leh Serlui bialtu MLA Lalrinsanga Ralte te pawhin thu an sawi a ni.