Politics vangin sakhuana a chêp, politics aṭanga do lêt a ngai - Vanlalawmpuii

Congress party chuan Lok Sabha inthlan tur pualin April 13, Inrinni khan Ramhlun North maxicab stand bulah street campaign an buatsaih a; Congress Mahila president Vanlalawmpuii Chawngthu chuan, politics avangin sakhuana a chêp tih sawiin, chu chu politics aṭanga do lêt a ngaih thu a sawi.

Vanlalawmpuii Chawngthu chuan, 'BJP leh a thawhpuite sorkar leh ta se, engtin nge Mizo mipui kan awm zel ang', tiin zawhna a siam a, "Zalên taka Lalpa rawng kan bawlnate a bo tawh ang a, missionary-te'n chanchin ṭha an hril a harsa em em tawh dawn. Ṭhenkhatin sakhuana hi politics-ah la lut suh u, tiin an sawi ṭhin. Politics avangin sakhuana a chêp a, politics aṭangin kan do lêt a ngai ta zawk. Vawiinah hian Congress, ZPM, MNF sawi a hun lo, BJP lam ṭang nge kan nih Pathian rawngbawl zel duh, tih inenfiah a ngai," a ti.