AMCRA-in ngaihdam an dil

All Mizoram Car Rental Association (AMCRA) chuan, Lok Sabha inthlanpuia official ṭhenkhatte tana rental car hman hawh chungchanga resolution an siam kaihhnawiah adviser to chief minister TBC Lalvenchhunga, MLA leh SCERT deputy director Florence Lalrinpuii te hnenah ngaihdam an dil.

AMCRA chuan TBC Lalvenchhunga leh Florence Lalrinpuii te hnena ngaihdam dilna lehkha an thawnah, "April 4, 2024-a Hotel Regency-a Assembly kan neihah leh press release kan siamah thu kan lo hriat danin MP Election 2024 awm tura TBC Car rental hman a nih chungchangah thu belhchian dâwl lo kan dawn avangin i inrawlh angin i hming mawi lo takin kan pho chhuak a. Kan thu hriatte thu belhchian dâwl lo a ni tih kan hriatin pawi kan ti hle. Social media-ah i hming mawi lo taka kan lo thehdarh avangin khawngaih taka min ngaidam hram turin kan ngen a che," an ti.

AMCRA hian April 4, 2024-a Assembly an neihah resolution siamin, Lok Sabha inthlan tura election official-te tana rental car hmanah TBC Car Rental chauh hman a nih avangin, TBC Car Rental neitu unaupa TBC Lalvenchhunga, CM adviser chu inrawlhah an puh a, MLA aṭangin a rang thei ang ber báng turin an phût a ni.

TBC Car Rental chauh hman chung-changah hian AMCRA chuan SCERT deputy director Florence Lalrinpuii pawh inrawlhah an puh a, "Thuneihna hman sual hreh lo sorkar hnathawk hi sorkar tichhetu a nih avangin sorkar hnathawk tlak niin kan hre lo a, a hna aṭang hian bàn ni rawh se," an ti bawk.

AMCRA puhna chungchangah hian TBC Lalvenchhunga chuan dan anga hma a lak dawn thu a lo puang tawh a ni.